ივანე ჯავახიშვილის სახელობის თბილისის სახელმწიფო უნივერსიტეტის პაატა გუგუშვილის სახელობის ეკონომიკის ინსტიტუტის საერთაშორისო სამეცნიერო
კ ო ნ ფ ე რ ე ნ ც ი ე ბ ი
"ეკონომიკა – XXI საუკუნე"
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
∘ ქეთევან ჭანიძე ∘ აჭარის ავტონომიური რესპუბლიკის ეკონომიკური პარამეტრებისა და მოსახლეობის სტრუქტურის ურთიერთკავშირის ანალიზი ანოტაცია. მოცემულ სტატიაში განხილულია აჭარის მოსახლეობისა და ისეთი ეკონომიკური პარამეტრების ურთიერთკავშირის ანალიზი, როგორიცაა დასაქმება, ეკონომიკური აქტიურობის დონე ასაკის, სქესის მიხედვით. მოსახლეობის რიცხოვნობას, მათ შორის შრომისუნარიანი მოსახლეობის რაოდენობას დიდი მნიშვნელობა აქვს ეკონომიკისთვის, ვინაიდან შრომა წარმოების ძირითადი ფაქტორია, რაც უფრო მეტია შრომისუნარიანი მოსახლეობის წილი ქვეყანაში, მით უფრო მეტი პროდუქტის შექმნის შესაძლებლობა იქმნება. ჩვენ შევეცადეთ სტატისტიკურ ინფორმაციაზე დაყრდნობით გაგვეკეთებინა შედარებითი ანალიზი და გვეჩვენებინა, რომ იქ სადაც მოსახლეობის ზრდის ტემპი დადებითია, ეკონომიკური პარამეტრებიც უფრო უკეთესია საქართველოს სხვა დანარჩენ რეგიონებთან შედარებით. სტატიაში მოცემულ გრაფიკებზე ნაჩვენებია მთლიანი დამატებული ღირებულების განაწილება ტერიტორიული ერთეულების მიხედვით, მისი ზრდის ტემპი, დადებითი და უარყოფითი სალდო და გამოყოფილია ის გარემოება, რომ სადაც ეკონომიკურად აქტიური მოსახლეობის რაოდენობა მეტია, იქ მთლიანი დამატებული ღირებულების ზრდის სალდო დადებითია. ასევე დეტალურადაა ნაჩვენები აჭარის მოსახლეობის ზრდის დინამიკა წლების მიხედვით და აღნიშნულია აჭარის მოსახლეობის წვლილი ქართველთა ოდენობის მატებაში. საკვანძო სიტყვები: დემოგრაფია, მოსახლეობა, ეკონომიკური აქტივობა, დასაქმება. შესავალი მოსახლეობის სტრუქტურას მნიშვნელოვნად განსაზღვრავს ცხოვრების სოციალურ-ეკონომიკური პირობები. ამავე დროს, დემოგრაფიული პროცესებისა და სტრუქტურის ცვლილება პირდაპირკავშირშია ქვეყანაში მიმდინარე ეკონომიკურ პროცესებთან. ეკონომიკური განვითარებისა და მოსახლეობის სტრუქტურას შორის კავშირი რთული და მრავალფეროვანია. ამიტომ თანამედროვე ცივილიზაციისათვის დიდი მნიშვნელობა აქვს ეკონომიკური ზრდისა და მოსახლეობის ურთიერთქმედების განსაზღვრას ეკონომიკური და დემოგრაფიული პროცესების რთული ჯაჭვის შესწავლის მიმართულებით. ეს გამოწვეულია იმით, რომ შრომა, ანუ ადამიანური კაპიტალი, წარმოების ძირითადი ფაქტორია. საერთაშორისო გამოცდილების გათვალისწინებით, დემოგრაფიულ მოვლენებსა და პროცესებზე საზოგადოების ზემოქმედების შესაძლებლობები შეზღუდულია. ერთი მხრივ, რთულია საჭირო რაოდენობის მატერიალური და ფინანსური რესურსების მობილიზება, ხოლო, მეორე მხრივ, საზოგადოების განვითარების თანამედროვე ეტაპისათვის მისაღები რეპროდუქციული განწყობის ჩამოყალიბება და მისი შესაბამისი დემოგრაფიული ქცევის რეალიზაცია. ამ შემთხვევაში გასათვალისწინებელია არა მარტო ადამიანთა შეხედულებების მრავალგვარობა, არამედ მათი განწყობის განმსაზღვრელი ეკონომიკური და სოციალური ფაქტორების, ეროვნული, ოჯახური, რელიგიური ტრადიციების მრავალფეროვნება და ცხოვრებისეულ ფასეულობათა ორიენტაცია. სახელმწიფოს მხრიდან შესაბამისი ნების გამოხატვისა და სათანადო ღონისძიებების გატარების გარეშე საქართველოს მოსახლეობის კლების შეჩერება შეუძლებელია. პრობლემის ფორმულირება და ანალიზი მოსახლეობის რაოდენობის განსაზღვრის არსებულ მოდელებს შორის აჭარის ავტონომიური რესპუბლიკისათვის, როგორც ქვეყნის შემადგენელი ერთ–ერთი თვითმმართველი ერთეულისათვის, გამოიყენება ის მოდელი, რომელიც გამოიყენება მთლიანი საქართველოსათვის. 2007 წელს აჭარის რეგიონის მოსახლეობა შეადგენდა 378,8 ათას კაცს, რაც ქვეყნის საერთო მოსახლეობის 8,62%–ია (იხილეთ ცხრილი 1). აჭარის ავტონომიური რესპუბლიკის, ისევე, როგორც ჩვენი ქვეყნის მთლიანი მოსახლეობის რაოდენობა 2015 წლამდე ზრდის ტენდენციით ხასიათდებოდა, რაც წლების მიხედვით საქართველოს მოსახლეობის საერთო რაოდენობაში მისი ხვედრითი წილის განუხრელი (8,62%–დან 8,83%–მდე) ზრდით გამოიხატება. ცხრილი 1 აჭარის ავტონომიური რესპუბლიკის მოსახლეობის რიცხოვნობა თვითმმართველი ერთეულების მიხედვით (2017 წლის 1 იანვრის მდგომარეობით) ათასი კაცი
წყარო: საქართველოს სტატისტიკის ეროვნული სამსახური. http://www.geostat.ge/ 2014 წელს საქართველოს მოსახლეობის ხელახალი, გაერო-ს მიერ შემოთავაზებული განახლებული მეთოდოლოგიით განხორციელებული აღრიცხვის შედეგად მნიშვნელოვნად შემცირდა როგორც მთლიანი ქვეყნის, ისე აჭარის ავტონომიური რესპუბლიკის მოსახლეობა. კერძოდ, 2015 წელს აჭარის მოსახლეობამ შეადგინა 334,3 ათასი კაცი, ხოლო საქართველოს მოსახლეობამ კი – 3 713,7 ათასი კაცი. ანალოგიური მაჩვენებლები 2016 წელს შეადგენდა შესაბამისად – 337,0 ათას კაცს და 3 720,4 ათას კაცს. მიუხედავად აჭარის მოსახლეობის რაოდენობრივი შემცირებისა, მისი ხვედრითი წილი საქართველოს მთლიან მოსახლეობაში მაინც განაგრძობდა ზრდას. ამ მაჩვენებელმა 2015–2016 წლებში შეადგინა შესაბამისად, – 9,0 % და 9,06 % (ცხრილი 1). მე-20 საუკუნის განმავლობაში აჭარის ავტონომიურ რესპუბლიკაში შობადობაზე გავლენას ახდენდა რელიგიური ფაქტორი. ამიტომ აჭარელი ხალხის ოჯახში იყო მრავალშვილიანობის ტრადიცია. 1980-იან წლებში აჭარის რეგიონში საკმაოდ მაღალი იყო შობადობის დონე და იგი მნიშვნელოვნად აჭარბებდა ქვეყნის საშუალო მაჩვენებელს, რაც რელიგიის ფაქტორითაც იყო განპირობებული. 1980-1989 წლებში ყოველწლიურად მოსახლეობის ყოველ ათას კაცზე 21,3 ბავშვი დაიბადა, 1990-1999 წლებში - 15,3 ბავშვი, 2000-2009 წლებში კი–12,9 ბავშვი. როგორც ვხედავთ, 2000 წლის შემდეგ ეს მაჩვენებელი შემცირდა. ის გაუტოლდა ქვეყნის საერთო მაჩვენებელს. ეს იმით არის განპირობებული, რომ რელიგიური ფაქტორის გავლენა 2000 წლის შემდგომ პერიოდში აჭარის ავტონომიური რესპუბლიკის შობადობაზე საგრძნობლად შემცირდა და ბავშვის ყოლაზე უკვე სოციალურ-ეკონომიკური ფაქტორები თამაშობს გადამწყვეტ გავლენას. შობადობის დონე მე-20 საუკუნეში მაღალი იყო საქართველოს საშუალო მაჩვენებელთან შედარებით. 1970-იან წლებში შობადობის დონე 2-ჯერ მაღალი იყო 2000-იან წლებთან შედარებით. დროის ამ ინტერვალში, განსაკუთრებით 2000-იან წლებში, შობადობის დონე ოდნავ მაღალია აჭარაში როგორც ქვეყნის საშუალო მაჩვენებელთან, ისე დანარჩენი რეგიონების შესაბამის მაჩვენებელთან შედარებით, მაგრამ ამ პერიოდის შემდეგ შობადობის დონე საგრძნობლად დაეცა და, შეიძლება ითქვას, კრიზისულ დონეს მიაღწია, განსაკუთრებით სოფლად. თუ ადრე (მაგალითად, 1980-იან და 1990-იან წლებში) ის შესამჩნევად მაღალი იყო ქალაქთან შედარებით, 2000-2009 წლებში ეს მაჩვენებელი უკვე საკმაოდ დაბალი იყო სოფლად (10,6 პრომილი) ვიდრე ქალაქად (15,7 პრომილი). ეს მიუთითებს იმაზე, რომ სოფლები იცლება ახალგაზრდებისგან, უარესდება მისი ასაკობრივი სტრუქტურა და სოფლად სოციალურ-ეკონომიკური პირობებიც საგრძნობლად დაბალია ქალაქთან შედარებით. გარდაცვლილთა რიცხვი აჭარაში ბოლო 40 წლის განმავლობაში დიდ ცვლილებებს არ განიცდის. მოკვდავობის დონე აქ ყოველთვის დაბალი იყო. საქართველოს დანარჩენ რეგიონებში სოფლად გარდაცვალების შემთხვევები ბევრად უფრო მეტია, ვიდრე აჭარის ავტონომიურ რესპუბლიკაში. ბუნებრივი მატების კოეფიციენტი აქ დადებითია. საქართველოს დანარჩენ რეგიონთა უკლებლივ ყველა სოფელში უფრო მეტი ადამიანი კვდება, ვიდრე იბადება. ჩვენს ქვეყანაში არსებული უმძიმესი დემოგრაფიული ვითარება განპირობებულია მის ცალკეულ რეგიონში დემოგრაფიული პრობლემების გამწვავებით, გამონაკლისია აჭარა, ქვემო ქართლი და სამცხე-ჯავახეთი. „რომ არა აჭარა, მთელ რიგ წლებში (1999-2004) საქართველოში მოსახლეობის ბუნებრივი კლება იქნებოდა. ამის კომპენსაცია ხდებოდა აჭარის მაღალი ბუნებრივი მატების ხარჯზე. შეიძლება ითქვას, რომ ქართველთა ოდენობის მატებაში აჭარას დიდი წვლილი მიუძღვის. ბუნებრივ მატებას აჭარაში ძირითადად განაპირობებს მოკვდაობის დაბალი მაჩვენებელი“ [თოთაძე, 2012: 73]. ასე გაგრძელების შემთხვევაში, შობადობის შემცირების შედეგად, მთელ მოსახლეობაში მოიმატებს ხანდაზმული ადამიანების წილი, მოსახლეობა დაბერდება და ამას ბუნებრივად მოჰყვება მოკვდავობის გაზრდა, ბუნებრივი მატების კოეფიციენტი კი უარყოფითი იქნება. განვიხილოთ რეგიონულ ჭრილში უმუშევრობის და დასაქმების დონეთა ცვლილებები. შევნიშნავთ, რომ უმუშევრობის შედარებით მაღალი მაჩვენებელია თბილისში (22,5%) და აჭარის ავტონომიურ რესპუბლიკაში (15,8%), შედარებით დაბალი აქტივობისა (თბილისში – 53,5%, აჭარის ავტონომიურ რესპუბლიკაში – 68,6%) და დასაქმების დონის (თბილისში – 41,5%, აჭარის ავტონომიურ რესპუბლიკაში – 57,8%) ფონზე (წყარო. საქსტატი). ერთი შეხედვით, ეს გვაძლევს საფუძველს ვიფიქროთ, რომ უმუშევრობის წინააღმდეგ ბრძოლის ერთ-ერთი ეფექტური საშუალება არის სწორედ სწრაფვა დეცენტრალიზაციისაკენ. სხვა სიტყვებით, რომ ვთქვათ, თუ რეგიონებში არსებობს ეკონომიკურად აქტიური მოსახლეობის დასაქმების შესაძლებლობა, შრომითი რესურსის მიზანმიმართული დეცენტრალიზაცია შესაძლოა გახდეს ერთი მხრივ რეგიონის განვითარების, მეორე მხრივ, უმუშევრობის შემცირების საფუძველი. თუმცა საკითხი კომპლექსურია და მოითხოვს დეტალურ განხილვას. საქართველოს შრომის ბაზარზე მთავარი რეგიონული განსხვავება დედაქალაქსა და ქვეყნის დანარჩენ ნაწილს შორის არსებობს, თუმცა სხვადასხვა რეგიონებს შორისაც არის გარკვეული სხვაობები. კერძოდ, აჭარის ავტონომიურ რესპუბლიკაში, სადაც სასოფლო-სამეურნეო მიწის გამოხატული დეფიციტია, უმუშევრობის დონე ორჯერ უფრო მაღალია, ვიდრე, მაგალითად, ქვემო ქართლში. აღნიშნული რეგიონული სხვაობების აშკარა ახსნა სხვადასხვა რეგიონის ურბანულ და სოფლის მახასიათებლებში შეგვიძლია ვეძებოთ. ოფიციალური უმუშევრობა გაცილებით უფრო დაბალია სოფლად, ვიდრე ქალაქად. ეს სხვაობა დაახლოებით 20%- ს შეადგენს. ისევე, როგორც მთელ საქართველოში, ასევე მის ცალკეულ რეგიონში დასაქმების დონე 2008 წლის აგვისტოს ომისა და გლობალური ფინანსური კრიზისის წარმოქმნის შედეგად მკვეთრად დაეცა და მას შემდეგ მხოლოდ უმნიშვნელოდ გაიზარდა. ამ თვალსაზრისით ერთადერთ გამონაკლისს აჭარის ავტონომიური რესპუბლიკა წარმოადგენს, სადაც 2008 წლის შემდეგ, მსოფლიო საფინანსო კრიზისის მთელი ციკლის განმავლობაში დასაქმების სტაბილური ზრდა დაფიქსირდა. ეს შეიძლება რეგიონში ტურიზმისა და მშენებლობის სექტორის განვითარებით აიხსნას, ასევე – 2008 წელს, აჭარაში მანამდე არსებული დასაქმების დაბალი დონით. XXI საუკუნის დასაწყისიდან დღემდე, მოსახლეობის ყოველწლიური ბუნებრივი ზრდა აღინიშნა მხოლოდ სამ რეგიონზე - აჭარაში, სამცხე-ჯავახეთსა და ქვემო ქართლში. ამ რეგიონებზე ეთნიკური და რელიგიური უმცირესობის შედარებით დიდი წილი მოდის. დიაგრამა 1. აჭარის ავტონომიური რესპუბლიკის მოსახლეობა 2002-2017 წწ. (ათასი კაცი)
წყარო: საქართველოს სტატისტიკის ეროვნული სამსახური. http://www.geostat.ge/ სტატისტიკის სამმართველოს მონაცემებით, აჭარის ავტონომიური რესპუბლიკის მოსახლეობის რიცხოვნობის ცვლილება 2002-2017 წლებში მოცემულია ზემოთ მოცემულ დიაგრამაზე. ყურადსაღებია, რომ 2014 წლის საყოველთაო აღწერით აჭარის ავტონომიური რესპუბლიკის მოსახლეობის რიცხოვნობა შეადგენდა 333,953 ათას კაცს, რაც დიაგრამაზე ასახულია 2015 წლის სვეტში, მაშინ როდესაც წინა წლებში მოსახლეობის რიცხოვნობა თითქმის 400 ათას კაცს აღწევდა. 2014 წლის მონაცემებით ქალაქ ბათუმზე მოდის აჭარის ავტონომიური რესპუბლიკის მოსახლეობის 46%, ქობულეთის მუნიციპალიტეტზე 22% (მათ შორის ქალაქ ქობულეთზე მოდის საერთო მოსახლეობის 9%), ხელვაჩაურის მუნიციპალიტეტზე 16%, ქედის მუნიციპალიტეტზე 5%, შუახევის მუნიპალიტეტზე 4%, ხულოს მუნიციპალიტეტზე 7%, მოსახლეობის დაახლოებით 55% ქალაქის მცხოვრებია, ხოლო 45% – სოფლის. 2002 წლისათვის აჭარის ავტონომიური რესპუბლიკის მოსახლეობა შეადგენდა ათას კაცს. 2014 წლისათვის კი – ათას კაცს. შესაბამისად, ამ 12 წლიანი პერიოდისათვის ბუნებრივი მატების კოეფიციენტი არის . ზრდის ამ ტემპით ადვილი გამოსათვლელია, მაგალითად, 25 წლის შემდეგ 2027 წლისათვის აჭარის მოსახლეობის რიცხოვნობა ათასი კაცი. 25 წლის განმავლობაში ზრდის ეს ტემპი, რა თქმა უნდა, დაბალი მაჩვენებელია. 2014 წელს საყოველთაო აღწერისას, სავარაუდოდ, გამოყენებული იქნა დათვლის განსხვავებული მეთოდოლოგია, რითაც უნდა ავხსნათ მოსახლეობის რიცხოვნობის მკვეთრი კლება დაახლოებით 40 ათასი კაცით. ამიტომ, მიზანშეწონილია, 2015-2017 წლებში აჭარის ავტონომიური რესპუბლიკის მოსახლეობის ბუნებრივი მატების კოეფიციენტის გამოთვლა მოხდეს გასული წლებისაგან დამოუკიდებლად. კერძოდ, თუ ათას კაცს, ხოლო ათას კაცს, ბუნებრივი მატების კოეფიციენტისათვის ამ 3 წლიანი პერიოდისათვის კვლავაც ვღებულობთ , შესაბამისად 2027 წლისათვის ახალი მეთოდოლოგიის გამოყენებით ვღებულობთ, რომ მოსახლეობის რიცხოვნობა იქნება ათასი კაცი. შინამეურნეობის ინტეგრირებული გამოკვლევის შედეგად დგინდება, რომ აჭარის ავტონომიური რესპუბლიკის ეკონომიკურად აქტიური მოსახლეობის პროცენტული წილი აჭარის ავტონომიური რესპუბლიკის საერთო მოსახლეობაში 2006-2016 წლებისათვის მერყეობს 36%-60% შუალედში. მნიშვნელოვანი ზრდის ტენდენცია არ შეიმჩნევა, თუმცა მაინც შეიძლება ითქვას, რომ ბოლო წლებში ეკონომიკურად აქტიური მოსახლეობის 5-8%–ით ზრდა ფიქსირდება (დიაგრამა 2).
წყარო: საქართველოს სტატისტიკის ეროვნული სამსახური. http://www.geostat.ge/
წყარო: საქართველოს სტატისტიკის ეროვნული სამსახური. http://www.geostat.ge/ აჭარის ავტონომიური რესპუბლიკის ეკონომიკურად აქტიური მოსახლეობის განაწილება 2006-2016 წლებისათვის საფუძველს გვაძლევს შევაფასოთ მთლიანად რესპუბლიკაში დასაქმებული, დაქირავებული, თვითდასაქმებული, გაურკვეველი დასაქმების და უმუშევარი მოსახლეობის პროცენტული წილი ეკონომიკურად აქტიურ მოსახლეობაში. 2006-2016 წლებში დასაქმებული მოსახლეობის წილი ეკონომიკურად აქტიურ მოსახლეობაში მოთავსებულია 75%-87% შუალედში, ამასთან, ბოლო წლებში, განსაკუთრებით კი 2016 წელს ის აღწევს რეკორდულ მაჩვენებელს 87%-ს. დაქირავებული მოსახლეობა 27%-40% შუალედშია მოთავსებული, თვითდასაქმებული მოსახლეობის წილი მოთავსებულია 47%-55% შუალედში, უმნიშვნელოა გაურკვეველი საქმიანობის მქონე მოსახლეობის წილი - მაქსიმუმ 0.2% და ბოლოს უმუშევართა წილი ეკონომიკურად აქტიური მოსახლეობიდან მერყეობს 13%-25% შუალედში, ამასთან, ბოლო წლებში უმუშევართა პროცენტული წილი კლებულობს და 2016 წლისათვის რეკორდულად მინიმალურ მაჩვენებელს 13%-ს აღწევს (დიაგრამა 3). თუ შევაფასებთ ეკონომიკურად აქტიური მოსახლეობის დასაქმებისა და ეკონომიკური აქტიურობის დონეს 2006-2016 წლებისათვის, შეიძლება გამოვიტანოთ შემდეგი დასკვნა: დასაქმების დონე ამ პერიოდისათვის მერყეობს 36%-60% შუალედში, ხოლო ეკონომიკური აქტიურობის დონე კი – 50%-71% შუალედში. დასაქმებისა და ეკონომიკური აქტიურობის დონეების მიხედვით მინიმალური მაჩვენებელი ფიქსირდება 2007 წელს - 36.4% და 48.8%, ხოლო მაქსიმალური მაჩვენებელი დასაქმების დონის მიხედვით გვაქვს 2015 წელს - 60.1%, ეკონომიკური აქტიურობის დონის მიხედვით 2012 წელს - 71.1% (დიაგრამა 4). დიაგრამა 4 წყარო: საქართველოს სტატისტიკის ეროვნული სამსახური. http://www.geostat.ge/ დიაგრამა 5 წყარო: საქართველოს სტატისტიკის ეროვნული სამსახური. http://www.geostat.ge/ საინტერესო შედეგებს იძლევა შრომისუნარიანი მოსახლეობის წილის ანალიზი სქესობრივი და საცხოვრებელი ადგილის მიხედვით. კერძოდ, აჭარის ავტონომიურ რესპუბლიკაში შრომისუნარიანი მოსახლეობის წილი შეადგენს აჭარის ავტონომიური რესპუბლიკის საერთო მოსახლეობის 64.7%, რომელშიც პრაქტიკულად ნახევარს ქალები, ხოლო ნახევარს მამაკაცები შეადგენს. ქალაქებში შრომისუნარიანი მამაკაცების წილი დაახლოებით 1%-ით ნაკლებია ქალებზე, ხოლო სოფლად კი პირიქით. ეს ტენდენცია პრაქტიკულად ნარჩუნდება მთლიანად საქართველოს მასშტაბით (გარდა ოკუპირებული ტერიტორიებისა, რომელთა მონაცემებიც არ გაგვაჩნია). აჭარის ავტონომიური რესპუბლიკის ქალაქებში შრომისუნარიანი მოსახლეობის წილი ჯამში შეადგენს 36.2%, სოფლად ოდნავ ნაკლებია და შეადგენს - 28.5 %-ს, მაშინ როდესაც უკანასკნელი 10 წლის განმავლობაში აჭარის ავტორნომიური რესპუბლიკის მოსახლეობის წილი საქართველოს მთლიან მოსახლეობაში სტაბილურად იზრდება 8,62%-დან 9.12%-მდე (იხილეთ დანართი 2). საინტერესოა გავარკვიოთ, აჭარის ავტონომიური რესპუბლიკის ქალაქებიდან და მუნიციპალიტეტებიდან უპირატესად რომელი ტერიტორიული ერთეული განაპირობებს აჭარის მოსახლეობის რაოდენობის ზრდას მთლიანად საქართველოს მოსახლეობაში. მე-5 დიაგრამაზე მოცემულია აჭარის ავტონომიური რესპუბლიკის ქალაქებისა და მუნიციპალიტეტების მოსახლეობის წილობრივი ცვლილება მთლიანად საქართველოს მოსახლეობაში უკანასკნელი 10 წლის განმავლობაში (2007-2017). დიაგრამა 6 წყარო: საქართველოს სტატისტიკის ეროვნული სამსახური. http://www.geostat.ge/ ყურადსაღებია ხულოს მუნიციპალიტეტის მოსახლეობის კლება 9%-დან 6%-მდე, შუახევის მუნიციპალიტეტის მოსახლეობის კლება 5,8%-დან 4%-მდე, ქობულეთის მუნიციპალიტეტის მოსახლეობის კლება 23.5%-დან - 19.9%-მდე. რაც შეეხება ხელვაჩაურის მუნიციპალიტეტს, რომლის მოსახლეობის კლებაც ამ გრაფიკის მიხედვით ასევე აშკარაა (24.2%-დან მცირდება 13.8%-მდე), აქ საქმე გვაქვს რიგ ობიექტურ პროცესებთან. ერთ-ერთი ამ პროცესთაგანია ხელვაჩაურის ტერიტორიების ქალაქ ბათუმისათვის მიკუთვნება. ბუნებრივია, ქალაქ ბათუმის განვითარების გეგმა სავარაუდოდ გაფართოებასაც გულისხმობს. 2012 წლიდან ქალაქ ბათუმის გაფართოება ხორციელდება მოსაზღვრე მუნიციპალიტეტის - ხელვაჩაურის ტერიტორიების ხარჯზე. ხელვაჩაურის მოსახლეობის ნაწილი საცხოვრებელი ადგილის მიხედვით უკვე ქალაქს მიეკუთვნა. შესაბამისად ქალაქის მოსახლეობის ზრდაც 32.3%-დან 41.1%-მდე ნაწილობრივ სწორედ ამით არის განპირობებული. თუმცა აშკარაა, რომ ქალაქის მოსახლეობა იზრდება ამ ტერიტორიული ცვლილებების გარეშეც და პრაქტიკულად აჭარის ავტონომიური რესპუბლიკის მოსახლეობის სტაბილური ზრდაც სწორედ ქალაქ ბათუმის მოსახლეობაზე მოდის. დიაგრამა 16-ზე წარმოდგენილია მთლიანი დამატებული ღირებულების განაწილება ტერიტორიული ერთეულების მიხედვით 2006-2016 წლებში საქართველოს მასშტაბით. ქვეყნის შიგა პროდუქტის დაახლოებით 42% მოდის დედაქალაქზე, რომლის ზრდის ტემპი უკანასკნელი 10 წლის განმავლობაში უმნიშვნელოა, პრაქტიკულად არ იზრდება მაჩვენებელი საქართველოს სხვა რეგიონების მიხედვით, უფრო მეტიც, გარდა აჭარის რეგიონისა ამ რეგიონებში მთლიანი დამატებული ღირებულების ფარდობითი მაჩვენებელი[1] უარყოფითი მნიშვნელობისაა, რაც, სამწუხაროდ, კლებას მიანიშნებს. შესაბამისად მთლიანი დამატებითი ღირებულების ზრდის ტემპი რეგიონების მიხედვით წარმოდგენილია მე-2 ცხრილში. ცხრილი 2 მთლიანი დამატებული ღირებულების ზრდისტემპი საქართველოს ტერიტორიული ერთეულების მიხედვით (2006-2016)
როგორც ვხედავთ, დედაქალაქის გარდა, პრაქტიკულად ყველა რეგიონში შეინიშნება კლება, კერძოდ: ქვემო ქართლში - 22,5%-იანი კლებაა, გურიაში თითქმის - 16,3%, სამცხე-ჯავახეთში - 15,8%-იანი, ხოლო სამეგრელო - ზემო სვანეთის რეგიონში - 8,9%. დედაქალაში ფიქსირდება 2,5% პროცენტიანი ზრდა, ხოლო აჭარაში კი 37,1%-იანი ზრდა. დემოგრაფიული პროცესები პირდაპირ აისახება რეგიონის მთლიანი დამატებული ღირებულების ზრდის ტემპზე. აჭარის არშექმნილი მთლიანი დამატებული ღირებულების ზრდის ტემპი ეკონომიკური საქმიანობის სახეების მიხედვით 2006-2016 წლებში წარმოდგენილია მე-3 ცხრილში. ცხრილის შესაბამისად დგინდება, რომ ბოლო წლებში ისეთ ეკონომიკური საქმიანობებზე, როგორიცაა: სოფლის მეურნეობა, ნადირობა და სატყეო მეურნეობა, თევზჭერა, მეთევზეობა (-57,8%); პროდუქციის გადამუშავება შინამეურნეობების მიერ (-30,9%); ტრანსპორტი და კავშირგაბმულობა (-56,1%); სახელმწიფო მმართველობა (-26,6%) ადგილი აქვს მთლიანი დამატებული ღირებულების კლებას. თუმცა საერთო ჯამში ამ წლებში აჭარაში დაფიქსირებული 37,1% ზრდა განპირობებულია ძირითადად მომსახურების სხვადასხვა სახეებზე მოსული მთლიანი დამატებული ღირებულების ზრდის მაღალი ტემპით (71,8%). ცხრილი 3 აჭარის ავტონომიური რესპუბლიკის მთლიანი დამატებული ღირებულების ზრდის ტემპი ეკონომიკური საქმიანობის მიხედვი (2006-2016 წწ.)
წყარო: საქართველოს სტატისტიკის ეროვნული სამსახური. http://www.geostat.ge/ დასკვნა ამრიგად, როგორც ვხედავთ, მიუხედავად საბაზრო ეკონომიკაზე გარდამავალი, რთული, წინააღმდეგობებით აღსავსე 28 წლიანი პერიოდისა, აჭარის ავტონომიური რესპუბლიკის მოსახლეობა, საქართველოს მთლიან მოსახლეობასთან შედარებით, მაინც ზრდის საკმაოდ მაღალი ტემპებით ხასიათდებოდა, რაც ოჯახების მრავალშვილიანობის ტრადიციით არის განპირობებული. გარდა ამისა, მოსახლეობის ზრდის შედარებით მაღალი ტემპების შენარჩუნება განპირობებულია აჭარის ავტონომიური რესპუბლიკის ეკონომიკური განვითარების პოტენციალით. აჭარას გააჩნია, ტურისტული, სავაჭრო და სატრანზიტო ინდუსტრიის განვითარების შესაძლებლობები. აჭარას ტურისტული აღმავლობის ტენდენცია აქვს. ასევე გააჩნია სამეწარმეო პოტენციალი. აჭარაში სოფლის მეურნეობის რამდენიმე დარგია განვითარებული, ძირითადად მეცხოველეობა. სავაჭრო პოტენციალზე შეიძლება ითქვას, რომ ოდითგანვე არის „დიდი აბრეშუმის გზის“ საკვანძო მონაკვეთი, საზღვაო პორტებით ხდება ასიათასობით ტონა ტვირთის ტრანზიტი როგორც აღმოსავლეთით – აზიაში, ისე დასავლეთით ევროპაში. სავაჭრო პოტენციალის განვითარება ავტომატურად უწყობს ხელს აჭარის სატრანზიტო პოტენციალის განვითარებას, გადაზიდვები ხდება ავიაციითაც და სარკინიგზო მაგისტრალითაც, რაც საბოლოო ჯამში მილიონობით ტონა ტვირთის ტრანზიტს განაპირობებს. აჭარის ავტონომიური რესპუბლიკის ეკონომიკური განვითარება ჯერ კიდევ ვერ პასუხობს მოსახლეობის მოთხოვნებს. თუმცა არსებული პოტენციალის რაციონალური გამოყენების შემთხვევაში, სავსებით შესაძლებელია ადგილობრივმა საწარმოებმა არა მარტო უზრუნველყონ აჭარის მოსახლეობის მოთხოვნის გაჯერება რეგიონის პროდუქციით, არამედ განავითარონ საექსპორტო დარგებიც და ხელი შეუწყონ ექსპორტ-იმპორტის დაბალანსებას, რაც აჭარის ავტონომიური რესპუბლიკის ეკონომიკური და დემოგრაფიული განვითარების ერთ-ერთი აუცილებელი პირობაა. გამოყენებული ლიტერატურა
[1] ფარდობითი მაჩვენებლის დაანგარიშებისას ვიღებთ საწყის მონაცემებს 2006 წლისათვის და საბოლოო მონაცემებს 2016 წლისათვის. საბოლოო მონაცემს ვაკლებთ საწყისს და ვყოფთ საწყისზე, მიღებულ შედეგს კი გამოვსახავთ პროცენტებში. |
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||